Meir snø er på veg til Agder og Telemark dei neste dagane.
Frå måndag kveld kan det komme 10 til 25 centimeter på 24 timar i midtre og ytre strøk vest for Skien, skriv Meteorologisk institutt på Twitter.
Ytst på kysten av Agder kan nedbøren komme som sludd eller regn.
Fleire trafikkulykker
Dei siste dagane har det komme mykje snø på Sørlandet.
Laurdag var det fleire trafikkulykker i Agder som følgje av krevjande køyreforhold. På E18 i Grimstad var to bilar involverte i ei ulykke som førte til at eitt køyrefelt måtte stengjast.
I Lyngdal kolliderte ein ATV med ein personbil, og to personar vart sende til sjukehus.
– Det har gått i eitt no i to døgn, det har vore enormt mange oppdrag, seier dagleg leiar Jan Ove Thygesen i Agder bilberging.
Har sendt ut farevarsel
Det er òg venta auka vind frå søraust måndag, særleg i Rogaland og sør i Hordaland.
Det er sendt ut gult farevarsel om stiv kuling og storm fleire stader langs kysten.
