Tidlegare fylkestopp godtek ikkje dommen

Mannen vart i tingretten dømd til to år i fengsel for omfattande økonomisk utruskap mot Sogn og Fjordane fylkeskommune.

Han vart også dømd til å betale 2,7 millionar kroner i erstatning .

– Dommen er feil. Han har erkjent utruskap for kring 200.000 kroner. Utover det har han ikkje vedgått noko som helst, seier forsvarar Stig Nybø og stadfestar at dommen blir anka.

800 beslag

Mannen stod tiltalt for økonomisk utruskap av 3,7 millionar kroner. Frå 2011 kjøpte mannen utstyr til seg sjølv og familien på fylkeskommunen si rekning . Også Florø fotball brukte av utstyret.

• Les også: Rassiaen slo ned som ei bombe i fotballklubben

Heime hos mannen, på hytta og på fleire ulike adresser gjorde politiet til saman 800 beslag i saka som vart meld politiet i 2015.

Då mannen møtte i Sogn og Fjordane tingrett før sommaren, bad politiet om fengsel i tre år utan vilkår for mannen. Påstanden var også opp til fire millionar kroner i erstatning.

Ikkje sikra ny vurdering

Ankefristen for dommen gjekk ut i går. Nybø seier klienten hans er budd på å ta påkjenninga med ei ny runde i retten.

• Les også: Fortvila eks-fylkestopp beklaga grov økonomisk utruskap

– Det er verre å bli uskuldig dømd enn å måtte ta ei ny runde, seier advokaten.

Han er også budd på at det ikkje er sikkert at saka kjem opp til ny behandling. Berre dommar med strafferamme på over seks år slepp automatisk igjennom til ny behandling.

– Vi har håp om at den slepp igjennom. Han er uskuldig dømd, seier Nybø.

Det har så langt ikkje lukkast NRK å få kommentar frå påtalemakta.