Ønskjer nordfjordingane velkomne til Møre

– Eg forstår at mange nordfjordingar ser nordover. Eg trur mellom anna at næringslivet ser vi er meir effektive i Møre og Romsdal, seier Sve.

– Så du er positiv til at Nordfjord blir ein del av Møre og Romsdal dersom Stortinget skulle ønskje det?

– Eg vil ikkje bli lei meg for det. Nordfjord og Sunnmøre har svært mykje til felles, seier Sve, som er tidlegare ordførar i Stranda kommune på Sunnmøre.

Store regionar

Regjeringa har signalisert at dagens 19 fylke skal reduserast til om lag 10. Høyringsprosessen er framleis ikkje avslutta og fylkestinga kring om i landet skal seie sitt innan utgangen av året.

Politikarane i Møre og Romsdal har vore klare på at dei ønskjer at fylket skal halde fram som i dag. Men med eit stort vestlandsfylke i sør og eit samanslått Trøndelag i nord kan stortingspolitikarane kome til at Møre og Romsdal blir for små.

Sve seier det er uaktuelt å legge opp til ein formell politisk prosess for å få Nordfjord innlemma i Møre og Romsdal. Samtidig minner han om at det er Stortinget som avgjer saka.

• Les også: Splitta Nordfjord seier nei til Sunnmøre

Kritisk fylkesordførar

Helge Andre Njåstad, leiar i kommunalkomiteen på Stortinget og partifelle med Sve, har tidlegare vore klar på at Nordfjord bør inn i Møre og Romsdal.

Fylkesordførar i Sogn og Fjordane, Jenny Følling, ser ikkje vekk frå at regjeringa ser føre seg nettopp ei slik løysing, ei løysning Følling sjølv har svært liten sans for. Ho meiner Sve prøver å mele si eiga kake på vegner av Møre og Romsdal.

– Eg forstår Sve si eigeninteresse i å styrke sitt eige fylke. Eg kjem ikkje til å legge opp til at fylket vårt skal splittast. Dette har eg full ryggdekning for både i fylkestinget og i Nordfjordrådet, seier ho.

• Les også: Vil ha nye samtalar om storkommune

Ser nordover

Rolf Domstein, konsernsjef i Domstein-konsernet i Måløy, ønskjer ikkje å splitte opp dagens Sogn og Fjordane. Samtidig kan han også leve godt med at Nordfjord blir ein del av Møre og Romsdal.

– Vi i fiskerinæringa i Måløy-området føler oss like mykje som sunnmøringar som fjordingar. Vi har like gode kontaktar nordover som sørover.

– Men er det slik at de har meir samarbeid med Sunnmøre enn med Sunnfjord?

– Ja, i enkelte samanhengar har vi det og ikkje minst i fiskerinæringa. Også andre delar av næringslivet langs kysten har eit nært samarbeid nordover. Vi er opne vi for å tenkje meir nordover, seier Domstein.