Vil jakte jerv med helikopter etter store tap av sauer

Dei siste dagane har det kome fram at to bønder kan ha mista så mange som 200 sauer på beite, og så langt har ikkje den ordinære lisensjakta nytta.

– Det er pining, for det er ikkje alltid sauene er drepne. Ofte finn vi tarmar og då kan vi følgje dei for å finne sauen, seier sauebonde Arnold Berge i Fjærland.

På Vestlandsrevyen i går fortalde han om jerven som har herja i sommar. Sauebøndene er fortvila over at mange sauer er skadde og drepne av jerv

Viltrådgjevar Hermund Mjelstad hjå Fylkesmannen i Sogn og Fjordane veit kva det sauebonden fortalde på Vestlandsrevyen i går betyr

– Det er snakk om at dei manglar 200 sauer, dei fleste er lam. Dette er store tal, seier Mjeldstad.

• LES OGSÅ: To jervar streifar rundt i fjella i Indre-Sogn - bøndene er uroa for saueflokken
• LES OGSÅ: Vil ikkje avlive jerv med det same

Kontroversiell avliving

Dei siste fem åra har 27 jervar vorte avliva i Luster, Årdal og Lærdal frå, eller ved hjelp av helikopter.

Mjelstad sine råd veg tungt når Direktoratet for Naturforvaltning tek stilling til den kontroversielle avlivinga. Han trur konsekvensen av sauedrapa i Fjærland blir nye helikoptertokt.

– Med den erfaringa vi har frå tidlegare vintrar, er dette mest sannsynleg. Men det det fleire ulemper, som ressursbruk. Det er ei dyr form for jakt. I tillegg er helikopterjakt og uttak i jervehi kontroversielle måtar å ta ut jerv på.

Har seks løyver

Det er til ei kvar tid seks lisensløyve for vanleg jervejakt ståande i Indre Sogn, men i den siste femårsperioden har det berre vorte teke ein jerv på denne måten.

– Eg vil tru at om det ikkje blir tekne ut jervar på lisensjakt, då må Statens naturoppsyn inn i Fjærland for å spore opp den jerven som har vore der, seier han.

• LES OGSÅ: Ekstra fellingsløyve for jerv
• LES OGSÅ: Fann seks kadaver etter sau og lam - meiner jerv har vore på ferde