– Dette med val av kommunenamn er noko som rører ved både identitet og kjensler. Eg synest det er vemodig at Hornindal ikkje lenger skal vere kommunenamn, seier ordførar i Hornindal, Stig Olav Lødemel.
Han understrekar at han har eit avslappa forhold til kommunenamnet. Men kommunestyret i Hornindal er delt så å seie på midten, der halvparten vil at den nye kommune skal heite Volda, mens den andre halvparten helst vil ha eit anna namn. 1. juni skal Volda og Hornindal ha møte i fellesskap. Der skal det stemmast over namnevalet. Blir det nei til Volda frå honndølane kan det ta tid før det nye namnet blir klart.
– Blir det nei her, må fylkesmannen kalle inn møte. Det kan han ikkje gjere før etter Stortingsvedtaket som er 8. juni. I tilfelle det skulle bli eit nytt møte så blir det den 27. juni. Om det då ikkje blir semje om kommunenamnet vil saka gå vidare til avgjerd i kongeleg resolusjon, seier Lødemel.
- LES OGSÅ:
Meiner at ei ny kommune bør ha eit nytt namn
Eit eige utval har sett på både namn og kommunevåpen, og konkludert med at Volda er det naturlege. Men dei møter motstand i Hornindal.
– Eg er ikkje så begeistra for Volda – namnet. Eg kjem til å stemme imot, og det trur eg dei fleste i mi kommunestyregruppe kjem til å gjere, seier gruppeleiar for Senterpartiet i Hornindal kommunestyre, Eldar Engelund.
Han meiner prinsipielt at ei ny kommune skal ha eit nytt namn, og seier han er skuffa over at namnekomiteen har landa på Volda.
– Eg er sikker på at alle i Volda kjem til å stemme for Volda. Det synest eg er lite inkluderande, og eg synest det er lite raustleik å spore i haldningane til voldingane i denne saka, seier Engelund.
- LES OGSÅ:
Sannsynleg at det blir Volda
Ifølgje ordførar Stig Olav Lødemel si uformelle kartlegging kan det sjå ut til at det kan bli eit knapt fleirtal for Volda som kommunenamn.
– Slik det kan sjå ut i Hornindal i dag kan vi oppleve at kommunestyret vil stemme for Volda med 9 mot 8 røyster, men det er vanskeleg å spå kva som blir resultatet om det blir fråfall og vararepresentantar på møtet, seier Lødemel.
Også Engelund ser at det kan gå den vegen.
– Eg trur nok vi dessverre vil ende opp med Volda, men eg likar det ikkje. Eg synest det kjem stadig tydlegare fram at det ikkje er nokon plan om å bygge ei ny kommune. Enden på visa er at vi blir implementert i Volda, og det kjennest ikkje bra, seier Engelund.