– Forholda på toaletta langs vegane er dårlege; det same er vedlikehaldet. Helse, miljø, tryggleik for ein yrkessjåfør er heilt fråverande, seier Glenn Morten Hestetun.
Etter snart tjue år som yrkessjåfør veit varebileigaren frå Årdal litt om toaletta langs norske vegar. Dei er «eit sorgas kapittel», meiner han:
– Eg veit ikkje noko anna ord å beskriva situasjonen med. Folk kan jo sjølve sjå på rasteplassane. Ein meter utom plassen finn du menneskeavføring. Det ser heilt forferdeleg ut, seier Hestetun, som òg er fylkesstyremedlem i lastebileigarforbundet i Sogn og Fjordane.
Toalettkaos
I sommar har turistar over heile landet møtt stengde toalett, som i turistmagnetane Lofoten og Sogn og på den populære nasjonale turistvegen over Aurlandsfjellet ved Sognefjorden (sjå tv-sak under):
Slike stengde dodører er kvardagen for mange yrkessjåførar, og i tillegg stengjer mange av desse toalettanlegga etter at turistane har reist heim, seier kommunikasjonsrådgivar Stein Inge Stølen i Norges Lastebileier-Forbund:
– Det er eit kjempestort problem at mange anlegg ikkje er tilgjengelege for yrkessjåførane i vinterhalvåret. Det øydelegg trivselen i arbeidet, og det kan igjen gå ut over trafikktryggleiken.
Lovde 90 døgnkvileplassar
Norske yrkessjåførar må følgja strenge reglar for køyre- og kviletid, og då kan det vera både krevjande og stressande å rekka fram til toalett i tide. Sjåførane har lenge kravd fleire døgnkvileplassar med reine toalett og skaplege dusjar.
Regjeringa må få opp farten, krev Norges Lastebileier-Forbund:
– Me forventar at Regjeringa innfrir løfta sine om å få på plass 90 døgnkvileplassar innan 2023. I dag er 39 på plass, og det betyr at Regjeringa ikkje ein gong er halvveges, seier Stølen.
– Eg er heilt samd i ønska til lastebileigarane, og me skal gjennomføra det, seier samferdselsminister Ketil Solvik-Olsen (Frp).
– I tillegg til dei 39 døgnkvileplassane som allereie er på plass, reknar me med å vera ferdige med ytterlegare ti i løpet av året, så alt tyder på at me er i god rute for å oppnå dette, seier Solvik-Olsen.
Illeluktande
Glenn Morten Hestetun blinkar inn til Sogndal med leveransar frå Årdal denne dagen. Yrkessjåføren forventar at Solvik-Olsen og Regjeringa held løftet sitt. For når Hestetun skal beskriva korleis toaletta langs vegane ser ut, svarar han slik:
– Det er vel rettare å seia at dei ikkje ser ut, ler Hestetun oppgitt:
– Dei luktar ille, og du brukar normalt ikkje dei som står langs landevegen. Toaletta er aldeles forferdelege, du går heller bak dei viss du absolutt må.