Hopp til innhold

Korte nyheter

  • Nordic Response: Boazodoallit áigot gáibidit buhtadusa

    Nordic Response 2024 -soahtehárjehus oidnogoahtá dán vahkus Eanodagas guovllus viidát, čállá Yle Sápmi.

    Oassi Ergona siiddas, Giehtagierraga bálgosis, lea vássán vahku áigge gártan sirdit ealus eará sadjái, go boahtte vahku rájes sin dálveguohtumiin Bálojávrri guovllus jorret juobe duháhat soalddáhat. Dál siidda eallu leage 50 kilomehter geahčen árbevirolaš dálvebáikkis.

    Ergona siidda boazodoalli Henri Proksi muitala, ahte soahtehárjehus lea barggahan olu, go áigi lea mannan sihke čohkkemii, johtimii ja biebmamii. Lassibarggu ovddas sii áigot gáibidit buhtadusaid Suoma Bealuštanfámuin.

    Yle Sápmi lea jearran Bealuštanfámuin, ahte leago sis áigumuš vejolaččat buhtadit bálgosiidda soahtehárjehusaid dagahan barggu ovddas, muhto eai leat lihkosnuvvan oažžut kommentára.

  • Gáibida meteorihta máhcahit Kalaalit Nunaatii

    Kalaallit Nunaatas lea boares meteorihtta boktán garra digaštallan politihkkarii, dutkii ja álbmoga gaskkas.
    Dán tonnasaš ruovdemeteorihtta gávdne dás čuohte jagi áigi oarjedavvi Kalaallit Nunaatas Innaanganeq guovllus, ja árvvoštallet dan leat gahččan guvlui dás 10.000 jagi áigi.

    Dutkit olles oarjemáilmmis leat viežžan oasážii meteorihtas ja dolvon museaide miehtá máilmmi. Ieš dan meteorihta leat ges dolvon Københámmanii.

    Siumut guovllu Folketinget lahttu, Aki-Matilda Høegh-Dam, ii šat dohkket dán, ja gáibida meteorihta jođánamosit buktit ruovttoluotta, dohko gosa dat gullá.

    – Áigi lea dál nu ahte Kalaallit Nunaata kulturárbbit gullet Kalaallit Nunaatii ja sin árbi ii galgga šat leat geasuheaddjin máilmmi museaide, lohká Aki-Matilda Høegh-Dam. Dan čállá KNR.gl neahttaáviisa.

  • Guokte nissona roasmmehuvaiga go tráhppá gahčai 

    Ákŋoluovttas Finnmárkkus leaba guokte nissonolbmo dolvojuvvon buohccivissui, tráhppá olggobealde luovvanii muhtin visttis ja nisson guovttos gahčaiga guhtta mehter vulos, dieđihit politiijat. Nisson guovttos galgaba leat garrasit roasmmohuvvan lihkohisvuođas.

    Soai vižžuiga gádjunhelikopterin mii doalvvui sudno Romsa buohccivissui, lohká politiijaid operašuvnnajođiheaddji Jan Arne Pettersen NRK:i
    Politiijat eai dieđe vuos siva manin tráhppá gahčai.