– Mun lean dárkilit veardidan ja jurddašan dán birra, ja lean ovttasráđiid iežan bearrašiin gávnnahan ahte mus lea dáhttu vuolgit NSRa presideantaevttohassan. Mun dovddan ahte mus lea ain ollu barggakeahttá sámepolitihkas, ja ahte mus leat sihke dat návccat ja mokta mii dárbbašuvvo jus galgá buori barggu dahkat. Jus organisašuvdna dan dáhttu, de mun vuolggán sin evttohassan, cealká Aili Keskitalo.
Aili Keskitalo (39) lea Guovdageainnus eret, lea náitalan ja leat golbma mánát. Sus lea almmolaš hálddahus mastergráda Københámmana Gávpeallaskuvllas. Son leamašan Norgga Sámiid Riikkasearvvi (NSR) jođiheaddji, ja vuosttaš nissonin son válljejuvvui sámediggepresideantan čakčat 2005.
