Ovdal juovllaid ollii Olympiagilvvuid dolla Norgi ja lea das rájes leamaš Stuorradikkis dassái go dolvojuvvo Áltái, gos ođđajagemánu 11.beaivve álggahuvvo OG-spáiddarviehkan Lillehammerii.
15 jahkásaš Eirik A. Ravna, guhte ovddasta Sirpmá valaštallansearvvi Deanus, lea okta daid nuorain guhte lea válljejuvvon viehkat OG spáiddáriin dan oktavuođas go Lillehammeris Norggas lágiduvvojit Nuoraid Olympiagilvvut guovvmánus.
– Sii leat rámis go sin valaštalli beassá dán láhkai oasálastit OG-doaluin Álttás, ja son duođaid ánssáša ge dán vásáhusa, lohká Sirpmá valaštallansearvvi jođiheaddji Monica Balto.
Viššalis valaštalli
Ravna lea muhtun jagiid juo leamaš mielde sihkkelastingilvvuin ja gilvala rabas luohkás. Son maid lea nu viššalit áŋgiruššan iežas valaštallansearvvi ovddas earret eará vurbbiid vuovdimiin, ja lea maid viššal earáid movttiidahttit searvat sihkkelastin birrasii Deanus.
Dien áŋgirduššama ovddas lei son maid okta evttohasain nammaduvvot «Årets ildsjel» - dán jagáš ángirduššan bálkkašupmái.
Son guhte Finnmárkkus válljejuvvui evttohassan dán bálkkašupmái, Trygve Kjærland Olsen (19), lea okta viđa finalisttain bálkkašupmái, mii juhkkojuvvo Lillehammeris Idrettsgalla doaluin.
Finnmárkolaš cahkkeha spáiddára
Trygve Kjærland Olsen lea son guhte galgá cahkkehit stuorra OG-spáiddara Álttás, mainna de galget nuorat miehta Norgga viehkat máttás, ja ollet Lillehammerii guovvamánu 12 beaivve.
- Nuoraid Olympiagilvvut lágiduvvojit Lillehammeris Mátta-Norggas guovvamánu gaskamuttus.