Statkraft: Árvvoštallet viiddidit Álttá fápmorusttega
– Mii dovdat buohkat Álttá historjjá. Muhto dás lea sáhka bidjat vel ovtta aggregáhta sisa.
Dan dadjá Statkrafta davviguovlluid direktevra, Dag Smedbold NRK:i maŋŋá diehtojuohkinčoahkkima sámediggepresideanttain maŋŋebárgga.
– Čoahkkin lea addán midjiide ipmárdusa mo Sámediggi bargá, ja dan lea dehálaš diehtit go geahčadat makkár vejolašvuođaid dálá rusttegat ja ođđa buvttadeamit sáhttet addit dás ovddos guvlui, dadjá Smedbold.
Statkraft lea geahčadan vejolašvuođa guhkidit Gilivuona bieggafápmobuvttadeami ja eará prošeavttaid. Álttá fápmorusttega viiddideapmi ii boađe váikkuhit Álttáetnui, čilge Smedbold:
– Eatnu stivrejuvvo ja golggahuvvo seamma vuogi mielde go ovdalge. Mii leat easka álgán gulaskuddat oainnuid ja leat čoahkkinastán gielddaiguin, Alta Laksefiskeri Interessentskapain (ALI) ja boazoealáhusain dasa mii gullá ieš dan prošektii. Muhto eanaš bargu boahtá dáhpáhuvvat bávtti siste, ja boahtá unnán váikkuhit eatnamiidda prošeaktaáigge jos jo álggahuvvoš.
Statkraft lágidage álbmotčoahkkima vejolaš viiddideami birra Álttás gaskavahku.