Dál dahká SÁNAG-guovddáš Kárášjogas šiehtadusa Jämtlándda leanain, mas fállo psykalaš veahkkebálvalus lullisámiide, geat dárbbašit veahki.
Håkan Gadd lohká stuorra dárbun dákkár šiehtadussii.
Gadd, guhte bargá Jämtlándda leana guovddášhoavdan, lohká stuorra dárbun nannet ovttasbarggu SÁNAG:in Kárášjogas.
– Buorre go šiehtadus dahkko
SÁNAG, mii lea sámi našuvnnalaš gealboguovddáš psykalaš dearvvašvuođa suddjemis, sis lea erenoamáš máhttu mot veahkehit sihke mánáid, nuoraid ja ollesolbmuid, geat rahčet psykalaš váttuiguin.
Gunn Heatta, gii lea SÁNAG jođiheaddjin - su mielas lea buorre go dát šiehtadus dahkko, danin go sii dihtet ahte dien guovllus leat oalle ollu váttisvuođat sihke Norgga ja Ruoŧa bealde, go jurddaša lullisámiid hárrái.
– Ollu iešsorbmen
Gadd muitala ahte iešsorbmen lea beali eanet Jämtlánddas go muđui Ruoŧas, ja dát lea duođalaš. Dat gelbbolašvuohta, mii SÁNAG:s lea dan sáhttet sii ávkkástallat guovtti dásis. Veahkki boahtá sin lusa dahje doppe guovllu sámit bohtet Kárášjohkii.
Stuorra lávkin formaliseret ovttasbarggu
Almmá dákkár šiehtadusa haga lea SÁNAG veahkehan lullisápmelaččaid Ruoŧa bealde, muhto dál go šiehtadus doaibmagoahtá njukčamánu 1. beaivvi rájes, de lohká Heatta dan stuorra lávkin formaliseret ovttasbarggu.
Guldal olles ášši:
