Sámi Valáštallan Lihttu ahtanuššan sakka
Sámi Valáštallan Lihttu (SVL) lea vássán jagis ahtanuššan sakka. Lahttolohku lei jagis 2022 sullii 4.000. Jagis 2023 lahttolohku lei 12.000.
- Sámi valástallan geasuha go dás lea sáhka identitehtas ja sámevuođas, lohká Stig Valter Tovås.
Son lea máŋga jagi ovddidan sámi valáštallama Fjell Skilag, SVL ja Árktalaš dálveriemuid bokte.
SVL:s ledje jagis 2022 oktiibuot 15 báikkálašsearvvi. Diimmá loahpas SVL:s ledje 43 báikkálašsearvvi.
SVL hálddahusjođiheadji, Britt Hjørdis Somby, lohká buori ja dihtomielalaš barggu buktán bohtosiid.
- Sámi valáštallit leat eambbo oidnosis. Erenoamážit leat FA Sápmis (spábbačiekčan) čeahpit vuovdalit iežaset, rámida Somby.