NRK Meny
Normal

Sámi nissonat fránska PSG čikčiid vuostá

Sámi nissoniid riikkajoavku soaitá deaivvadit Occitanian, ja das čikčet nissonat geat leat fránska njunuš joavkkus Paris Saint-Germain FC ja maiddái Frankriikka riikkajoavkkus.

Arctic Winter Games 2016

Sápmi vuittii 2016 AWG čiekčamiid. Dál lea FA sápmi plánegoahttán čiekčamiid Occitania vuosttá.

Foto: Dan Robert Larsen / NRK

- Mii háliidat maiddái sámi nissoniidjoavkku ealáskahttit ja dál lea boahtán jearaldat čiekčat Occitaniain vuostá, nissonjoavkku vuostá mii mannan gease čievččai ja vuittii stuorát cupa, muitala FA sámi presideanta Håkan Kuorak.

Ja Sámi nissonjoavku ferte maid čiekčagoahtit ovttas ja diet čiekčan leage ráhkkaneapmi boahttejagi Womens ConIFA Cupii.

Conifa-čiekčama mihttu

Håkan Kuorak lohká FA Sámi mihttun dan ahte nissoniidjoavku searvá Womens ConIFA Cupii ja maid ConIFA European Cupii mii šaddá Nices dahje Nagorno-Karabahkas.

-Sihke nissoniidjoavku ja almmáiolbmuidjoavku fertejit čiekčat go dárbbašit olu čuoggáid jos boahtteáiggis galggaš leat vejolaš searvat stuorát čiekčamiidda. Conifa oainnat árvvoštallá man olu čuoggát joavkkuin leat go bovdejit mielde čiekčamiidda, čilge Kuorak.

Hálidit Ungáras čiekčat

Sámi almmáiolbmuid riikkajoavkku galggašii ges leat mielde Conifa Heratigecup čiekamiin Ungáras, suoidnemánu álggus. Dáidda čiekčamiidda servet guhtta joavkku. Earret eará Conifa joavkkuin Felvidék ja lágideaddjijoavku Székely Land mat leat maid mielde Conifa máilmmimeašttirčiekčamiin Londonis geassemánu álggus.

FA Sápmi 2014

Sámi lmmáiolbmuid riikkajoavkku bovdejuvvon Conifa Heratigecup čiekamiin Ungáras.

Foto: John Einar Eira / NRK

FA Sámis dihtet Szekely Land ovddasteaddjiid dáhttut sámi joavkku searvat go sámegiella lea suoma-ugralaš giella urálalaš giellajoavkkus. Ungáras šaddet čiekčamat Budapestas dahje Debrecenis.

Ovttasbargagoahtá Kalaallit Nunaatain

Mannan vahkkoloahpa lágiduvvui Conifa váldočoahkkin Davvi-Kyprosis, gos FA sámi presideanta Håkan Kuorak maid čoahkkinastii Kalaallit Nunaata ovddasteaddjiiguin. Sii sohpe lágidit jahkásaččat čiekčamiid almmáiolbmuid ja maiddái nissoniid várás.

- Kalaallit Nunaata čiekčá ruovttučiekčamiid Københápmanis Dánmárkkus, gosa plánejit jahkásaš čiekčamiid maidda Sápmi de searvá, muhto lea maid sáhka futsal-čiekčamiin.