Sámediggi loahpahan jienastuslogu guorahallama
Sámedikki dievasčoahkkinjođihangoddi lea odne mearridan loahpahit prošeavtta "Sámedikki jienastuslogu guorahallan". Sii baicce máhccet dáinna áššiin Sámedikki dievasčoahkkimii, sierra áššin.
Sámediggi attii diibmá Telemarksforskningii bargun guorahallat manne olbmot geat leat registrerejuvvon Sámedikki jienastuslohkui válljejit dieđihit iežaset eret. Guorahallan galggai maiddái kártet leat go subjektiivvalaš gáibádus ja objektiivvalaš gáibádusat ollašuhtton jienasteddjiid anonymiserejuvvon kártema bokte. Prošeavtta ulbmil lei oažžut ovdan dieđuid mat livčče ávkkálaččat Sámediggái viidáset barggus válggain ja jienastusloguin.
Dievasčoahkkinjođihangoddi bissehii prošeavtta merrekeahtes áigái politihkalaš rieja geažil. Dál dat lea mearridan ollásit loahpahit dan. Doppe leat máŋga fáktora mat sáhttet váikkuhit dasa ahte olbmot eai vástit guorahallama ja nu ii leat árvu guorahallama bohtosiin, čállá sámediggi preassadieđáhusas.