Rapporttas daddjo ahte ii leat buorre go olles ruhtasumit leat mákson prošeavttaide mat eai leat gárvvistuvvon.
Badjel 12 miljovnna ruvnno, 2001 ja 2005 gaskka, sáhttá dáinna lágin mannan duššás.
Dán ruđa ovddas eai leat dalle ihtán dat oahpponeavvut mat livčče galgan, čájeha rapporta.
- Ii leat riekta mannan
- Jagiid čađa leamaš dieinna lágiin ahte mii leat ruhtadan prošeavttaid main buot eai leat čađahuvvon.
Min mielas lea dat váttisvuohta go ii oro riekta geavahit almmolaš ruđaid go bohtosat eai boađe, lohká Sámedikke presideanta Aili Keskitalo.
- Hálideat bargat
Rapporta duođašta ahte min vuogádat ii leat doarvái buorre dán oktavuođas.
Dáinna mii hálideat bargat ja dan dihte lea ge dát árvvoštallan čađahuvvon, lohká Keskitalo.
- Dušše bealli prošeavttain álggahuvvon
Vaikko Sámis lea ge stuora dárbu ođđa oahpponeavvuide , de leat dušše bealli álggahuvvon oahpponeavvoprošeavttain gárvanan
Oktibuot dán áigodagas leat 315 oahpponeavvoprošeavtta álggahuvvon, mii dagaha birrasii 53 ođđa prošeavtta juohke jagi.
Dáin leat dušše 146 prošeavtta gárvvistuvvon. Dát mearkkaša ahte 46 proseantta prošeavttain leat ollašuvvan, čállá Finnut Consult rapportas.
