Prost evttohuvvon davviriikkaid ráđi girjjálašvuođa bálkkašupmái
Girječálli Fredrik Prost girji “Leŋges hearggi Sáhčal fatnasa” lea evttohuvvon davviriikkaid ráđi girjjálašvuođa bálkkašupmái sámi giellaguovllus. Girjji lea goasttidan DAT-lágádus.
Girji lea láidehus sámi vuoiŋŋalašvuhtii, muhto seammás maid čábbát diktejuvvon ja ornamenterejuvvon dieđalaš muitalus makkár ii leat ovdal muitaluvvon.
Girji vuodju dasa, mo váldit ruovttoluotta dan mii lea muitalusaid mielde juo áigá dolin manahuvvon: goavdásiid ja luonddu oskku.
Oktiibuot leat 13 romána, diktačoakkáldaga ja muitalusa evttohuvvon davviriikkaid ráđi girjjálašvuođa bálkkašupmái 2024.
Dát boahtá ovdan Davviriikkaid ráđi neahttasiiddus.
Fredrik Prost lea garraduojár ja lea eret Viikusjávrris, mii lea unna giláš Vazáš čearus davimus Ruoŧas.