Nato veahki Durkii

Nato lahttoriikat ja searveriikkat - maiddái Suopma ja Ruoŧŧa - sáddejit 1400 veahkkebargi Durkii dan eanandoarggástusa maŋŋá, dieđiha Nato.

Veahkebargiid gaskkas leat gádjunveahka ja ohcanbeatnagat, buollinčáskkadeaddjit, inšenevrrat, dearvvašvuođabargit ja eanandoarggistanáššedovdit.

Lagabui 8000 olbmo duššan

Badjel 8700 olbmo leat dán rádjai gávdnan duššan Durka ja Syria eanadoarggástusain, dáid riikkaid dieđuid mielde. Dán guovtti riikii lea dieđihuvvon sierradilli eanandoarggástusaid maŋŋá. UNICEF ballá ahte dáid eanandoarggástusain sáhttet leat máŋga duhát máná duššan.

Kárášjoga almmái dubmejuvvon 7 jahkái giddagassii

Kárášjoga almmái lea dubmejuvvon Sis- ja Nuorta-Finnmárkku diggegottis čieža jahkái giddagassii go lea oastán, vuovdán, vurkkodan ja geavahan narkotihka, čállá iFinnmark.

Albmá bealušteaddji Gard Lind-Iversen muitala iFinnmárkui ahte almmái áigo guoddalit duomu ja sii dál áigot árvvoštallat guoddalit go muhtun osiid duomus vai olles duomu.

Miessemánus 2021:s dutkagohte politiijat ášši go muhtin olmmoš gávnnai páhka Sámiid Vuorká-Dávvira meahcis Kárášjogas ja das lei narkotihkka.