Osnes Fause guorahallagoahtá Per Kitti rivttiid
Loga sámegillii
Boazosápmelaš Per Lars Kitti (75) ristnieida Åse Merethe Påve Johansen ja Stine Benedicte Sveen leaba ásahan Spleis, dainna ulbmilin ahte bálkáhit advokáhta guorahallat Kitti rivttiid.
Dássái leat čoaggán eambbo go 100.000 ruvnnu.
Elden fitnodaga advokáhtta Anett Beatrix Osnes Fause dat lea váldán badjelasas barggu.
– Son galgá sihkkarastit Piera rivttiid. Maid son lea massán, maid gáibidit ja mo viidáseappot, čilge Påve Johansen.
Per Kitti lea ássan ja bargan bohccuiguin ávdin sajis Sálliris Romssas. 1980-logu loahpageahčen huksegohte ássanviesuid su viesu birra.
– Dát lea dáhpáhuvvan almmá su jearakeahttá, čilge Kitti.