Oktasaš Sisaváldima logut čájehit ahte 104 ohcci leat čájehan beroštumi Sámi allaskuvlla 60 oahpposaddjái maid leat álmmuhan.
Rektor movtta
Dál leat 20 ohcci bidjan ovdaskuvlla ja dábálašoahpaheaddji ohppui vuosttaš vuoruheami, 2007as lei dát lohku dušše vihtta, čállá Sámi allaskuvla preassadieđáhusas.
Dieid loguin leat dušše Norggabeale studeanttaid logut, sámi studeanttat eará riikain ohcet oahpposaji njuolgga allaskuvllas.
Sámi allaskuvllarektor Steinar Pedersen vuohttá lihkostuvvan áŋgirdeamin.
– Mis lea leamaš earret eará Gollevirgi-doaibma mainna leat ožžodan studeanttaid oahpaheaddjeoahpuide, lohká Pedersen.
Diehtosiidi fárren
Dáid beivviid leat Sámi allaskuvllas fárregoahttán Diehtosiidii ja Sámi allaskuvllas lea ohcanáigemearri lea viiddiduvvon boahttemánu 15. beaivve rádjai.
– Čakčat álget oahput ođđa Diehtosiiddas ja mii leat hui movttegat go dál beassat fállagoahttit studeanttaide buoret oahppobirrasa, dadjá Steinar Pedersen.