Norgga Sámiid Riikasearvi dat dáhttu Olli vástidit leago sus ain eanetlohku stivret Sámedikki maŋŋá go Nordkalottfolket-lista ii šat gula bargiidbelodaga ovttasbargojovkui. Opposišuvnna galgá oažžut buot dieđuid seammás go čoahkkin álgá, deattuha Vars.
NSR gáibida čilgehusa
Norgga Sámiid Riikasearvvi sámedigge áirras , Silje Muotka dat ikte dovddahii ahte sii NSR beales áigot gáibidit ahte sámediggepresideanta dievasčoahkkima álggadettiin jo čilge geaiguin son áigu stivret Sámedikki dan guokte jagi mat leat vel dan válga-áigodagas .
Opposišuvnna bellodagat leat dássážii dušše media bokte gullan ahte Bargiidbellodat ja Egil Olli ii šat stiivre Sámedikki eanetloguin go jo Nordkalottfolket-lista ii šat leat oassin sin ovttasbarggus.
– Álbmot dárbbaša maid diehtit ahte olles Sámediggi ain doarju ja dohkkeha ahte Olli dat joatkkašii Sámedikki stivret, ja nu lea ge maid lunddolaš ahte dievasčoahkkin jienasteame bokte beassá formálalaččat dohkekhit ahte Olli joatká, deattuha Muotka.
Eai leat vel vuolláičállán ovttasbargošiehtadusa
Bargiidbellodat, Árja, Sámit Lulli-Norggas ja Åarjel Saemiej Giehl lista eai leat formálalaččat vel vuolláičállán ođđa ovttasbargošiehtadusa. Dasa lea čilgehussan ahte sii muđui jo ledje galgat ođasmahttit šiehtadusa dál go sii guokte jagi leat stivren Sámedikki ja nubbi eará ášši lea ahte sii eai leat ge vel ollen čielggadit galggašedje go vel ovtta listtu fitnet mielde ovttasbargui Nordkalottfolket-listtu sadjai vai fas beasašedje stiivret eanetloguin, lohká Vars.