Oahpponeavvut leat šaddagoahtán heahkka sáhkan válgagiččus ovdal čavčča Sámedikkeválggaid.
Gieskat attii Sámediggi nuvttá oahpponeavvuid skuvllaide.
Muhto Norgga Sámi Riikkasearvvi ii ádde manne bargiidbellodat lea dáinna nu rámis.
–Bargiidbellodat lea lohppidan nuvttá oahpponeavvuid. Muhto eai leat nagodan buvttadit ođđa oahpponeavvuid, ja dan dihte skeŋkejit dál boares girjjiid skuvllamánáide, lohká presideantaevttohas Aili Keskitalo.
–Sirdet ovtta vuorkkás nubbái
NSR presidentaevttohas muitala ahte dál sirdet girjjiid ovtta vuorkkás nuppi vuorkái, ja čujuha dasa ahte Guovdageainnu skuvllas leat girjjit kealláris mat eai leat anihahttin oahpahusas.
–Bargiidbellodat lea sirdán oahpponeavvuid ovtta kealláris nuppi keallárii, ja mun in jáhke dat leat nu ollu ávkin sámi skuvlii ja sámi mánáide, oaivvilda Keskitalo.
Lohppidit lasi nuvttá girjjiid
Bargiidbellodat ges čállá preassadieđáhusas ahte sii leat nagodan 40% lasihit oahpponeavvobuvttadeami. Bargiidbellodat leat guovtte jagis duppalastán oahppogirječálliid bálkká.
Dál lohpidit maid nuvttá oahppogirjjiid skuvllaide ja gielddaide, maiddái daid oahppogirjjiid mat gárvanit dán čávčča, nu muitala Willy Ørnebakk, Gáisaguovllu válgabires.
