Ođđa raporta: Šiehtadusaid olis ii leat čearuin nu ollu dadjamuš
Ođđa raporta čájeha ahte čearuin Ruoŧas lea ollu heajut sajádat šiehtadusain jus veardida eanangeavaheaddjiiguin
Lea vuosttaš gearddi go dutkit leat beassan guorahallat čearu šiehtadusaid eanangeavaheaddjiiguin.
Maŋŋel guorahallama bođii raporta Stockholm Enviroment Institutes(SEI) mii čájeha ahte eanangeavaheaddjit leat šiehtadusaid vuoitit.
– Šiehtadusat maid čearut dahket eanangeavaheaddjiiguin addet juogalágán suoji bohccui, boazodollui ja bohcco buresbirgejupmái muhto dain leat várat, dadjá dutki Rasmus Kløcker Larsen.
Dutkama vuođđun, mii lea bistán golbma jagi, leat vihtta čearu ja 15 šiehtadusa leamaš.
Ruoŧa Sámiid Riikasearvi, RSR, mii lea dutkamušas leamaš mielde, ii loga bohtosa hirpmahahttin.
– Dien mii gal juo diđiime ja ahte eanangeavaheaddjit mat dahket šiehtadusaid leat stuora multinationála dahje stuora ruoŧa fitnodagat. Sis leat resurssat hábmet šiehtadusaid mat heivejit sin áigumušaide, muitala RSR:a ságadoalli.