Hopp til innhold

Korte nyheter

  • Posten dolvon 170 tonna ávdnasiin Ukrainai

    Norgga álbmot lea oktiibuot 170 tonna heahteveahkkeávdnasiid sádden Ukrainai Postena mielde dán rádjai dán jagi.

    Posten lea cuoŋomanu rájes fállan olbmuide sáddet heahteveahkkeávdnasiid nuvttá Ukrainai soađi geažil.

    – Dábálaččat lea okta lástabiila vuodján Ukrainai vahkkosaččat, muhto dáid maŋimuš vahkkuid leat golbma lástabiilla vuodján vahkkosaččat, muitala Postena konseardnahoavda, Hans-Øyvind Ryen.

    Dás lea sáhka eanaš ullobiktasiin, dálkasiin ja juovlaskeaŋkkain, maid olbmot leat sádden veahkkeorganisašuvnnaide Ukrainas. Posten joatká fálaldaga boahtte jagi, muitala Ryen.

    Post-trailer
    Foto: Nils Midtbøen / Nils Midtbøen
  • Romssa politiijat báhče albmá

    Romssa politiijat leat báhčán albmá Loabágis bearjadat ija, čállet politiijat preassadieđáhusas.

    Politiijat ožžo dieđu mannat dán báikái veahkkin dearvvašvuođabargiide. Politiijat jovde báikái dii. 01.40, ja doppe šattai dakkár dilli ahte politiijat šadde báhčit albmá, gii juvlagoivvoniin lei vuodjimin.

    Doavttir duođaštii albmá jápmán dallánaga maŋŋá báhčima. Politiijat eai roasmmohuvvan dáhpáhusas. Politiijaáššiid erenoamášossodat dutkagoahtá ášši.