Kornelia áigu dálvvi maid demonstreret: Lea ožžon jo 92.000 ruvdnui sáhkuid

Vaikko dálvi lea boađi boađi, ja sii leat badjel 120 beaivvi doallan vuostálastinleairra, de eai áiggo Luonddu Nuorat ja eará miellačájeheaddjit vuollánit.

Meteorologat váruhit, ahte sáhttá muohttit juoba 30 cm čuovvovaš 24 diimmu siste Davvi-Norggas.

Miellačájeheaddjit eai illut galbma dálkái, iige leairras šatta leahkit somá orrut, muhto sii áigot lihkostuvvat.

– Leaira bissu, dadjá Kornelia Elise Kristensen Natur og Ungdomas.

Verddevuohta Riehpovuonas

Sii leat geasi ja čavčča mielde doalahan vuostálastinleairra Márgohpnjárggas, Riehpovuonas.

Juste dál leat čiežas geat orrot leairras.

Son ieš idjada campingvovnnas, muhto dadjá ahte eatnašat geat orrot leairras orrot lávus.

Leairras sii ráhkadit borramuša, ožžot čázi kránnjáin ja bohccobierggu Fiettar ja Fála orohagain.

– Ja geasset leat oggon guliid ja vegetárabiepmu ráhkadat go muhtumin leat šattosborrit dáppe, muitala Kristensen

Eai vuollán

Dálvvi ektui sis ii leat vel nu olu maid ferte bargat. Sii áigut beare sirdit gievkkana vistái man sii láigohit, go olgun šattai menddo galmmas málestit.

– Mii fertet maiddái ordnet dálvebiktasiid sidjiide geat bohtet leirii ja geain eai leat doarvái biktasat.

Muhto man guhká áigut joatkit dáinna leairrain, lea eahpesihkar.

– Mii leat dáppe nu guhká go dárbbašat, dadjá Kristensen.

Vaikko lea čoaskkis, de lea buorre mokta

Birgitte Dalheim Laksforsmo bođii leirii duorastaga, ja áigu leat das vahkku, čájehan dihte doarjaga. Son áigu lávus oađđit, ja son jáhkká dat boahtá šaddat galmmas.

– Fertet geahččalit liekkadit duljiiguin ja biktasiiguin. Muhto sáhttá šaddat čoaskkis ja garra biegga.

Muhto vaikko sáhttá leat čoaskkis, de dadjá Laksforsmo ahte lea buorre mokta.

– Čohkkát dás ja hállat ja návddašat. Mis leat olbmot geat bohtet iešguđet báikkiin nu ahte mii hállat dan birra, gos sii bohtet ja mo doppe lea. Oahppat veaháš nubbi nuppis, dadjá son.

Sus lea maid doaivva ahte bohtet vuoitit ášši.

– Mun jáhkán ahte mii fertet dušše joatkit ja sávvat ahte šaddá nu go mii háliidit. Mun doaivvun dan, ja áiggun goit dahkat dan maid jáhkán ahte sáhtán vai nu dáhpáhuvvá.

– Manan vaikko giddagassii ášši bealis

Kornelia Kristensen muitala, ahte jus politiijat gáddet, ahte alla sáhkkut vuollánahttet sin, dalle lea politiija ádden olles dili boastut.

– Mun lean ožžon 92 000 ruvnnu sáhkku, lohká Kornelia Elise Kristensen.

Son lea gearggus vuostáiváldit čuovvumušaid mat vuosttildeamis bohtet, vaikko son oaivvildage dan leamen boastut.

– Mii sávvat dieđusge, ahte dat ii mana nu guhkás.