Australiijalaš eamiálbmotjoavku vuittii odne guoddalanášši federála duopmostuolus oljo- ja gássajiehtanasa Santos vuostá.
Fitnodat áiggošii ásahit stuorra gássaguovllu Tiwi-sulluide Timormerrii Australiija davverittus.
Eamiálbmogat navdet gássabohkamiid sáhttit bilidit mávssolaš borramušguovlluid ja vuoiŋŋalaččat árvvolaš báikkiid.
Norggas leat dál buot politiijaguovlluin dronepilohtat. Politiijas leat oktiibuot 100 dronepilohta, čállá Justiisa- ja gearggusvuođadepartemeanta preassadieđustis.
Dronaid sáhttet atnit go ohcet ja gádjot olbmuid, dat lea ávkkálaš reaidu politiijaide oažžut ollislaš gova váttes situašuvnnain, dadjá justiisa- ja gearggusvuođaministtar Emilie Enger Mehl.
Goalmmát kvartálas leat 95.626 olbmo Norggas buohccin dieđihuvvon psyhkalaš hástalusaid dihte. Nu čájehit logut maid P4 lea viežžan NAV:as.
Dat leat 33,65 proseantta eambos go 2018:s.
Nav-direktevrra Hans Christian Holte oaivvilda pandemiija leat dehálaš sivvan dán ahtanuššamii.
Guovttis golmma olbmos geat báhcet ruovttus psyhka dihte leat nissonat.
– Nissoniin lea stuorát ovddasvástádus praktihkalaš hommáid ektui árgabeaivvis, muitala generálačálli Psyhkalaš dearvvašvuođaráđis Tove Gundersen.
