Paul Undheim čohkkái meieriija jođihanjoavkkus ja son barggai maid ollu laboratorias. Son muitala ahte Finnmárkkus leamašan ovdal guhtta meieriija mat ledje Čáhcesullos, Girkonjárggas, Leavnnjas, Hámmárfeasttas, Álttás ja Deanus. Gaskka-Finnmárkku meieriija Leavnnjas lei doaimmas 1954 rájes gitta čakčamánnui 1997 rádjai ja doppe ledje 10/11 bargi.
Meieriijaspánnjaid siste mielki 40 buolašgrádas
Álgojagiid ledje guorbmebiillat main lei rábas gálvokássa mat vižže mielkki boanddain Porsáŋggus, Davvesiddas, Lágesvuonas, Kárášjogas ja Reihvágis. Kárášjogas sáhtii muhtumin leat birrasii 40 buolašgráda ja de han gal ieš sáhttá smiehttat mo de sáhtii geavvat lohká Paul Undheim gii ássá Skogende báikkis veahá beavžžabealde Leavnnja čoahkkebáikki. Spánnjat mat geavahuvvojedje gesse 10 - 50 lihttera mielkki.
Erling Johannesen lei okta guhte ráhkadii mielkerámppaid
Meieriijaspánnjat fertejedje bidjot mielkerámpii gos de guorbmebiila daid vieččai. Mielkerámppaid gal boanddat ieža ráhkadedje daid mihttuid miel maid meieriija lei mearridan. 82 jahkásaš Erling Johannesen, gii ássá Kolviikkas Porsáŋgguvuona oarjjabealde, muitá bures dien áiggi.