Mearrádus Porsáŋggus sáhttá lága rihkkut
Duorastaga mearrádus Porsáŋggu gielddastivrras guorahallat vejolašvuođaid ásahit bieggaindustriija Vuorjenárgii sáhttá rihkkut lága.
Dan dadjá konsuleantafitnodaga Gávcci AS jođiheaddji, Per Olaf Persen, NRK:ii.
– Gielda vajálduhtii bivdit boazodoalliin oainnu. Sii eai leat čuvvon gulahallanlága, nu mo sii leat geatnegahtton. Dát ášši lea eahpitkeahttá dakkár ášši mas gáibiduvvo gulahallan boazodoalloberoštumiin maidda dát guoská, deattuha Persen.
Gulahallan sámi beroštumiiguin lea geatnegasvuohta maid stáhta, gielddat ja fylkkagielddat fertejit čuovvut.
Gieldda áššibáhpiriin ii namuhuvvo boazodoallu sátnegežiinge, muhto sátnejođiheaddji Jo Inge Hesjevik (Olgeš) čuoččuha liikká gieldda čuvvon gulahallangeatnegasvuođas.
– Mun lean singuin háleštan telefovnnain. Dan duođašta mu telefovdnalogga. Orru dan láhkái, ahte sii áigot váldit mu formella meattáhusain, muhto dat formella álgá odne, vástida Hesjevik.
Les på norsk