NRK ráidu Kunstnerliv dat muitala dáiddára Máret Ánne Sara birra skábmamánu 13. beaivvi, dál go nubbi áigodat sáddejuvvo.
Sámis son gal lea dovddus, sihke dáiddárin ja aktivistan.
Dál tv-geahččit oahpásmuvvet eanet suinna ja su dáiddalaš eallimiin. Ja prográmmas oaidnit maiddái go Máret Ánne deaivvada Niillas A. Sombbyin.
Soai deaivvadeaba Savvonis, Álttá suohkanis. Doppe lea dat šaldi man Niillas ja muhtun eará aktivisttat vigge bávkalit 1982:s.
Máret Ánne sihkku gatnjaliid go čuožžuba šaldi alde, man dán áigge soapmásat gohčodit Sombyšaldin.
Ii bala dieđiheames
Sihke Máret Ánne ja Niillas leaba dovdan dárbbu čájehit ahte eaba dohkket dan mii mearriduvvo eiseválddiid bealis, ja mii váikkuha sápmelaččaid birgenláhkái.
Niillas massii gieđa ja nuppi čalmmi dalle go son čájehii iežas vuostehágu, 40 jagi dás ovdal.
Diekkár aktivista ii leat Máret Ánne.
Muhto su dáidda lea garas, go sihke ráppiiguin ja bohcco siskilušaiguin čájeha movt eiseválddiid mearrádusat čuhcet Sápmái. Earenoamážit lea son ollu bargan iežas vielja Jovsset Ántte bággonjuovvanáššiin.
Šaldi alde beassá Máret Ánne jearrat Niillasis daid dáhpáhusaid birra mat leat oassin Álttá-akšuvnnas.
Máilbmi oaidná gii son lea
Máret Ánne Sara dáidda čájehuvvo miehtá máilmmi, ja nie son beassá máilbmái muitalit maid sámi servodat vásiha, go bággonjuovvamat ja sisabahkkemat leat oassin árgabeaivvis.
Okta dain stuorámus dáhpáhusain lei Venezia biennale, ja prográmmas čuovvut su doppe.
Ain leat Máret Ánne Sara dáidagat olgun máilmmis muitaleame. Juste dál leat su dáidagat Fearsulluin, Kanadas, Islánddas, Itálias ja Duiskkas.
Sotnabeaivvi 13.11.2022 lea prográmma Máret Ánne Sara ja Niillas A. Somby birra oaidnin ládje NRK TV:s iđđes juo, diibmu 06.00 rájes..