Kuhmunen oaččui nuoraidbálkkašumi
Sara Elvira Kuhmunen oaččui odne Såhkie, Ubmi sámesearvvi, nuoraidbálkkašumi. Johkamohkálaš Kuhmunen lea Sáminuorra searvvi jođiheaddji, ja lea maŋemus jagiid áŋgiruššan dáistalit sápmelaččaid vuoigatvuođaid ovddas, ja searvi čállá ahte son lea ovdagovva eará sámi nuoraide iežas čielga ja duostilis jiena dihte. Sutnje geigejuvvo maiddái 5000 ruvdnosaš ruhtaskeaŋkka.
Earát geat leat ožžon dán bálkkašumi ovdal leat Marja Mortensson, Maxida Märak ja Amanda Kernell.