Jørn Lier Horst girji jorgaluvvon sámegillii
Jørn Lier Horst girji, «Operasjon Tordensky: Detektivbyrået nr. 2», lea jorgaluvvon sámegillii. Dá lea vuosttas Lier Horst girjjiin mii jorgaluvvo sámegillii. «Operašuvdna Bajánbalva: Detektiivadoaimmahat nr. 2» lea girjji namma.
– Girječállái lea álo riggodahkan vásihit ahte muitalusat olahit ođđa lohkkiid eará gillii.Ja juste dát illudahttá mu erenoamážit, go dás lea sáhka unna, áitojuvvon giellajoavkkus, lohká girječálli Jørn Lier Horst.
Ánne Márjá Guttorm Graven lea jorgalan girjji sámegillii.
– Go dákkár beakkán girjjiid jorgala, de besset min mánát lohkat iežaset eatnigillii, ja nu ožžot sii seamma referánsavuođu go mánát geat besset eanetlogugillii lohkat, lohká jorgaleaddji Guttorm Graven.