Savio-čájáhus finihii moatti diibmui Lofuohtas

Osloi dat galget dáidagat, mat dán geasi leat jođašan miehtá Norgga. Sámi dáidda lea maid jođus, ja dán vahku leat sámi dáiddára John Savio barggut leamaš Spålávuolles, Nordlánddas.

• Loga/les: Else fikk denne nasjonalskatten i bursdagsgave: – Da begynte tårene å trille

Rievtti mielde galge Savio dáidagat Hurtigrutena čuovvut gitta Hámmerfestii, muhto Covid-njoammun fatnasis dagahii ahte sirde dáiddačájáhusa gáttis. Ja nu de bisánaste ge dáidagat dan báikái gos John Savio ieš orui ovtta gaska.

Oaččui Savio dáidagiid

Nationálmusea čoakkáldatbargi Trine Nordkvelle illuda, go besse Savio-dáidagiid čájehit.

– Lea leamaš nu somá oaidnit ahte olbmot beroštit dán fálaldagas, vaikko vel lea ge dušše moatti diibmui, dadjá son.

Nordkvelle muitala ahte muhtun guossit leat dolin ožžon Savio dáidagiid.

– Lei okta dievdu gii muitalii munnje ahte su máttaráhkku oaččui Savios guokte dáidaga máksun go lei beassan su viesus idjadit moadde ija, dadjá Nordkvelle.

Nationálamuseas dihtet ahte John Savio dáidagat gávdnojit máŋgga ruovttus doppe dain báikkiin gos Savio lea orron.

Savio lei nu geafi ahte vuvddii dáidagiid hálbái, vai lea idjasadji ja borramuš. Ja Spålávuolles (Svolvær) muitalit ahte máŋggas leat oastán su dáidagiid dušše viđa ruvdnui, main dál lea áibbas eará árvu.

• Loga: John Andreas Savio (1902 - 1938)

Logai teáhterbihtás

Neavttár, teáhterčálli ja artista Sven Henriksen lei oassin čájáhusas, gos logai oasi teáhterbihtás «Okto».

– Gal dat lei gudni dán johttičájáhussii searvat, go mun dieđán hui ollu John Savio dáidagiid ja eallima birra, dadjá Henriksen.

Beaivváš Sámi našunálateáhter dat čájehii Henriksena bihtá «Okto» 2002:s, dalle go lei 100 jagi áigi go Savio riegádii.

• Loga: Verdens største Savio-samling skal «hjem»
• Loga: John Savio – Norsk kunstnerleksikon

Sámi dáidagat bisánit Osloi

Geassemánu 11. beaivvi 2022:s lea dan ođđa Nationálamusea almmolaš rahpan.

• Loga/les: Nasjonalmuseet åpner i 2022

Dohko lea Sven Henriksen bovdejuvvon, ja son áigu doppe maid lohkat dan maid logai odne Lofuohtas.

– Lea nu somá go mu teavsttaid háliidit rahpamii, lohká Henriksen. Su mielas lea nu mávssolaš ahte Savio dáidagat besset oassin bistevaš čájáhusas dan ođđa fiinna visttis.

Borgemánus leat ges sámi dáiddára Máret Ánne Sara dáidagat mat finadit su ruovttubáikkis. Su čoakkáldat «Pile o'Sápmi Supreme» čájehuvvo Guovdageainnus ovdal go dat nai bisána Osloi.

• Loga eanet johttičájáhusa birra dás (ekstern lenke): Norge rundt med Nasjonalmuseet i 2021 – Nasjonalmuseet