Holmberg nammaduvvon dáidaga gudnedoavttirin
Ohcejohkalaš dáiddár Niillas Holmberg (33) lea nammaduvvon Lappi universitehta dáidaga gudnedoavttirin, čállá Yle Sápmi. Lappi universitehta lea Roavvenjárggas.
Niillas Holmberg lea šaddan dovddusin čállin, neavttárin ja musihkkárin. Holmberg ovdanbuktimis sápmelašvuohta ja luondu leat vuolggasadjin ja guovddážis. Holmberg ánsun lohkkojuvvo maiddái sámi dálá dáidaga ovddideapmi.
Gudnedoavttirin vihaheapmi lea alimus fuomášupmi, maid universitehta sáhttá olbmui addit.
Lappi universitehta háliida dainna čalmmustahttit olbmuid, geat leat leamaš mielde ovddideamen universitehta dutkan- ja oahpahusdoaimma, bargguineaset ovddidan riikkaidgaskasaš ovttasbarggu dahje dahkan dovddusin lappilaš kultur- dahje ealáhussuorggi.
– Ii dákkárii olmmoš leat goassige ráhkkanan dahje vuordde dakkáriid. Illu ja gudni. Ii dás eará sáhte lohkat, illosa Holmberg.