Høgmo dolle Asiai
Sámi spábbačiekčanriikajoavkku ovddeš váldohárjeheaddji, Per Mathias Høgmo, heaitá ruoŧa Häcken hárjeheaddjin.
Son álgá hárjeheaddjin Urawa Red Diamonds-nammasaš joavkku ovddas Japanis.
64-jahkásaš Høgmo lea bures lihkostuvvan hárjeheaddjin Ruoŧas, ja spábbačiekčan árvvoštallit davviriikkain leat maid namuhan su vejolaš evttohassan ođđa riikajoavkku hárjeheaddjin Ruoŧas.
Urawa Red Diamonds dat leat otne almmuhan ođđa hárjeheaddji nama iežaset mediaásahusaid bokte.
– Lean giitevaš dan ovddas maid lean beassan vásihit Häcken hárjeheaddjin, dovddaha Høgmo NRK:i.
Son lea maid leamaš Norgga spábbačiekčanriikkajoavkku jođiheaddjin, sihke nissonjoavkku ja almmáiolbmuidjoavkku.
Høgmo, guhte lea eret Rivttágiin (Gratangen) Romssas, lei Sámi spábbačiekčanriikajoavkku hárjeheaddji 90-logu álggus.