Dát lea okta evttohusain Norgga-Ruoŧa boazoguohtunsoahpamušas mii geigejuvvui Ruoŧa ja Norgga ministariidda mannan vahku. Muhto Norgga eanandoallo- ja biebmoministtar, Ovddádus-bellodaga Sylvi Listhaug, ii doarjjo dákkár evttohusa.
– Imaš go nu bastilit dál jo hilgu
Ellinor Marita Jåma mielas lea imaš go Norgga eanandoalloministtar Sylvi Listhaug nu bastilit dál juo hilgu osiid evttohusas ođđa Norgga-Ruoŧa boazoguohtunsoahpamušas.
– Máksit eatnamiid ovddas
Ellinor Marita Jåma mielas lea imaš go Norgga eanandoalloministtar Sylvi Listhaug nu bastilit dál jo hilgu osiid evttohusas ođđa Norgga-Ruoŧa boazoguohtunsoahpamušas.
Foto: Dan Robert Larsen / NRKJåma, guhte lea jođihan dan davviriikkalaš sámi bargojoavkku geigejedje mannan vahkku iežaset rievdadusárvalusa soahpamuššii.
Muhtun boazoguohtunguovlluin livčče buhtadusaid máksin eatnamiid ovddas áidna vejolašvuohta čoavdit guohtunriidduid, lohká Jåma.
Son sávvá maid ahte ráđđehusat geavahit guhkebus áiggi geahčadit evttohusa. Ammal de áddejit ahte dat ii livčče varra nu ollu sajiin gos gárttašedje dorvvastit dan buhtadusmáksin čovdosii.
Guhká gulahallan boazodolliin
Sii leat dal beannot jagi guorahallan ášši ja gulahallan boazodolliin goappátge bealde rájá ja de sii leat oaidnán ahte muhtun guovlluin dáidá leat buoremus čoavddus jus stáhta oasttašii eatnamiid ovtta orohagas, ja attášii daid nuppi orohahkii dahje sámi čerrui.
Ja nu de čoavddašedje dákkár čielga praktihkalaš váttisvuođaid eanageavaheame dáfus maid stáhtatge ieža muhtun muddui leat dagahan go maŋimuš jagiid leat váldán osiid boazodolliid guohtoneatnamiin feara makkárge eará doaimmaide, čilge Jåma.
Geahččalan čohkket evttohusaid
Son sávvá ahte ráđđehusat bidjet olu deattu dan evttohussii maid sii geigejedje mannan vahkus, go das leat sii jobe geahččalan čohkket evttohusaid maidda eanaš oassi boazodoallin Norgga ja Ruoŧa bealde sáhttet miehtat, ja sin mielas dáhkidivčče maid diet evttohus riektesihkkarvuođa boazodolliide goappátge bealde riikkarájá maid sii nu olu jagiid leat váillahan, deattuha Jåma.
Deaivvadit geassemanus Islandas
Norgga ja Ruoŧa ráđđehusaid njunnošat deaivvadit geassemanus Islandas davviriikaráđi čoahkkima oktavuođas gos de áigot digaštallat viidáset mot buoremus lági mielde joatkit ođđa Norgga-Ruoŧa boazoguohtunsoahpamušabarggu vai dat fargga sáhtašii loahpalaččat vuolláičállot.
