Boraspirevahágiid eai bastte buhtadit ollislaččat

Suoma stáhta ii bastte buhtadit diimmá boraspirevahágiid ollislaččat, dieđiha Yle Sápmi. Boazodoalliide máksojuvvo cuoŋománu 13. beaivve rájes 74 proseantta spiriid dagahan boazovahágiin. Loahppaoassi máksojuvvo easka de, go dasa fidnejit ruhtadeami stáhta lassibušeahtas. Jagis 2022 boraspiret dagahedje boazodollui vahágiid badjel 10 miljovnna euro ovddas.

Sámi nuorat giktalit eará nuoraid álgit "nuvttá" oahpaheaddjeoahppui  

Golbma sámi nuora geat ieža leat oahpaheaddjeoahpus, leat ožžon barggu Sámedikkis hástit eará nuoraid váldit oahpaheaddjeoahpu. Dan-Jonas Sparrok, Amalie Urheim ja Anne Ragnhild Porsanger galget guđetge sámi váldoguovllu gokčat.

Oahpaheaddjeváilivuohta servodagas dahká ahte leat erenoamáš buorit stipeandaortnegat nuoraide geat háliidivčče oahpahussuorgái. Nuorat galget juohkit dieđuid stipeandaortnegiid birra mat fállojuvvojit sihke Sámedikkis ja Statens Lånekasses.

Ovdamearkka dihte Sámediggi juolluda 50.000 jahkái sámi mánáidgárdde- ja oahpaheaddjeoahpuide, ja Statens Lånekasse ges sihkku 50.000 studieloanas

Dan-Jonas Sparrok gokčá máttasámi guovllu, Amalie Urheim julevsámi guovllu ja Anne Ragnhild Porsanger ges davvisámiguovllu.

Sámediggeráđđi Mikkel Eskil Mikkelsen (NSR) dadjá ahte vaikko leat leamaš veahá bohtosat das go leat stipeanddat, de oaidná Sámediggi dárbbu vel eanet návccaid bidjat čalmmustahttit dáid ortnegiid.

Fritt Ord gutnebálkkašupmi geigejuvvo odne

Odne diibmu logis oažžu Elle Marie Hætta Isaksen Fritt Ord gudnebálkkašumi iežas barggu ovddas unnitálbmotsuodjalemiin ja sámiid eamiálbmotrivttiin.

Dáppe sáhtát geahččat go bálkkašupmi geigejuvvo sutnje.

Fritt Ords Honnør bálkkašupmi lea 100.000 ruvnnu. Bálkkašupmi juhkkojuvvo Fritt Ord vuođđudusa stivrras mávssolaš doaimmaid ovddas mat leat ávkin sátnefriddjavuhtii.