NRK Meny
Normal

Hástala sápmelaččaid čiŋadit gávttiin odne

– Lean nu čeavlái go árgabeaivvi beasan čiŋadit sámegávttiin, illuda neavttár Sarakka Gaup.

Sarakka Gaup

SÁMI GÁKTEBEAIVI: Dát beaivi maid lea mielde gievrudahttimin sámi iešdovddu ja servvodaga, oaivvilda sámi teáhterneavttár Sarakka Gaup.

Foto: Privat

Odne lágiduvvo gáktebeaivi miehtá Sámi njealját geardde. Dán beaivve maid Noereh! nammasaš nuoraidsearvi lea álggahan, ávžžuhuvvojit buot sámi čiŋadit gávttiin.

  • Guldal:

Sámi teáhterneavttár Sarakka Gaup guhte ássá Gironis, logai iežas otná iđit mannat viega bargosadjái, gákti dieđus ge vel badjelis.

–Gákteholbi gártá šlivggodit nannosit go viegat?

– Jo ii got dat leat čába, vástida Gaup.

– Earenoamáš beaivi

Lohká gáktebeaivvi mearkkaša hui ollu alcces.

– Dat lea šaddan hui erenoamáš beaivin midjiide geat ássat dáppe Gironis. Muhto ii soaitte leat seamma láhkai jus ásat Guovdageainnus, go doppe han muđui maiddái eará beivviid oidnojit ollu gávttehasat. Ja odne lea várra doppe buohkain gákti badjelis, lohká Gaup.

– Makkár kommentáraid oaččut Gironis go dus lea gákti badjelis dieppe?

– Vuoi go don leat fiinnis, gulan dávjá. Dáppe lean ožžon dušše positiiva kommentáraid, vástida Gaup.

Su mielas gáktebeaivi lea šaddan sukseassan, earenomážit nuoraid gaskkas.

– Mii hui čeavlát čiŋadat gávttiin dál. Dát beaivi maid gievrudahttá sámi iešdovddu ja servvodaga, oaivvilda Gaup.

  • GEAHČA 2015 GÁKTEBEAIVVI:
    Reportasje fra Gáktebeaivi - Koftedagen 2015.