NRK Meny
Normal

Girjealmmuheamit sámegillii goarádussan

Girjelágádus ČálliidLágádus almmuha girjjiid dárogillii jos de čoggošii ruhta almmustahttit girjjiid sámegillii.

Forlagssjef John Trygve Solbakk sitter foran en bokhylle

ČálliidLágádusa beaivválašjođiheaddji John Trygve Solbakk ii loga iežaset nagadit almmustahttit girjjiid sámegillii go eai oaččo ollislaš ruhtadeami almmuhemiide Sámedikkis. Dál almmustahttet dárogillii jos de tiinnešedje veaháš mainna nagadivčče almmustahtttit muhtin girjji sámegillii

Foto: Piera Balto / NRK

( Gula ášši sáme- ja dárogillii vuolimusas dán siiddus/ Hør innslag på samisk og norsk nederst på siden)

ČálliidLágádusa beaivválašjođiheaddji John Trygva Solbakk muitala dili dál leat šaddan vel losibun almmustahttit girjjiid sámegillii. Dán lohká dannego Sámediggi lea dán jagi gáibidišgoahtán ahte jos Sámediggi galgá doarjut sámegielgirjái buvttadandoarjaga, de ferte girjelágádus gávdnat vel lássiruđá earrasajis. Girjelágádus galgá ieš máksit viđat oasi juohke sámegielgirjealmmustahttimis.

Ruhta ii gávdno

Dán dili lohká dagahan váttisin almmustattit ođđa girjjiid sámegillii. Iežas ii gal loga vel fuomášan gos ruđaid galggaš oažžut sámegielgirjjiid buvttadeapmái. Ášši lohká leat nu ahte jos sii Norgga Kulturráđis ohcet lassiruđa almmustahttit girjjiid sámegillii, de lohket doppe ahte Sámediggi dat galgá dáid ruhtadit. Diekkár vástádusa ožžot sii gos dal de jearášit ruhtaveahkki, de ruhta ii gávdno.

Sámediggi bidjan lassinoađi lágádusaide

Norgga Sámedikki kulturjuhkosa fágajođiheaddji Johan Matteus Triumf duođašta ahte Sámediggi dán jahkái lea mearridan ahte girjelágádusat galget ieža máksit viđat oasi goluin go buvttadit ja almmustahttet girjjiid sámegillii. Seammás lohká ahte Sámediggi lea dán jagi vuoruhan ruhtadit čáppagirjjálašvuođa girjjealmmustemiid.

Sámediggeráđđi áigu ođđasit guorahallat ášši

Henrik Olsen

Sámediggeráđđi Henrik Olsen muitala iežaset fuomášan makkár dillái sii leat dahkan girjelágádusaid mat almmustahttet girjjiid sámegillii. Áigot geahččalit rievdadit viđatoasse buhtadeami maid dál gáibidit lágádusain.

Foto: Monica Falao Pettersen / NRK

Sámedikkeráđđelahttu Henrik Olsen lohká iežaset ráđis leat fuomášan lágádusaid váttis dili viđatoasseruhtademiin. Danne áigot sii dán geahččalit rievdadit. Seammás lohká maid Henrik Olsen iežaset áddet ahte eai sámegielgirjjit vuovdde dan mađii ahte dáiguin dál lágádusat tiinnešedje.

Fuomášahttá lágádusaid ruhtadit viđatoasi iežaset bargguin

Son fuopmášahttá ahte lágádusat sáhttet dán 20 proseantta maid ieža galget ruhtadit, dása sáhttet bidjat bargguid maid ieža barget siskkáldasat dainna girjeprošeavttain. Sii áddejit bures ahte lágádusat eai fitne gosge lassiruhtadeami girjealmmustahttimiidda, go buohkat čujuhit dasa ahte Sámediggi dat galgá ruhtadit girjealmmustahttimiid.

Muhto ii son maidge dasa gal loga jos dal sámi lágádusat almmustahttet girjjiid dárogillii, go dáid girjjiide ii gal Sámediggi leat moge seaguhuvvon.

Sámediggi galgá ruhtadit girjealmmustemiid sámegillii

Sámedikki ovddasvástádus lea ruhtadit sámegielgirjjiid almmustahttima, ja sii áigot dál 2016 bušeahtas geahčadit mo sáhtašedje buoridit vejolašvuođaid lágádusaide oažžut Sámedikkis ollislaš ruhtadeami sámegielgirjealmmuhemiide. Ja boahtte jahkái leat sii maid bargamin ođđa strategalaš plánain, mii maiddái galggašii buoridit eara áššiid girjjálašvuođa dilis. Das lea earret eará sáhka doarjjaortnegiin lágádusaide, nu go girjjálašvuođadoarjagiin, girjebussedoarjagiin, ja mo lágádusaide livččii vejolaš addit ruđaid dovddusindahkat ođđa girjjiid.