Geavaha gáktebeaivvi geahččalit oažžut Tesla ásaheaddji ságaide

– Bávččagahttá mu oaidnit mo industriijafitnodagat bilidit min eatnamiid Sámis. Dát fitnodagat eai beroš min rávvagiin. Guoládaga sámit čálle reive Nornickel fitnodahkii jo jagis 2014, muhto fitnodagas eai leat vel vástidan.

Nu čilge lujávrelaš Andrei Danilov.

Danilov lea eret Guoládagas Ruoššas, ja lea Sámiráđi várrelahttu. Sámiráđđi celkkii gieskat čielgasit, ahte sii dorjot áŋgirdeami ávžžuhit Tesla fitnodaga hilgut Nornickel buktagiid.

• Loga: Hástala sápmelaččaid čiŋadit gávttiin odne

– Suvdilis boahtteáigi

Guoládaga Sápmelaččaide lea váivi oaidnit man láhkái Nornickel lea bilidan eatnamiid Taimirnjárggas. Seammá ilgadis dilli lea Guoládagas.

Danne leat Taimir guovllu olbmot ja Murmansk guovllu olbmot ovttastan návccaideaset.

– Ráhkis Hearrá Elon Musk. Mii bivdit du, ahte it oasttašivčče nihkkela, veaikki dahje eará buktagiid maid Ruošša ruvkefitnodat Nornickel buvttada.

Nie čállo reivves mii lea sáddejuvvon Tesla fitnodaga álggaheaddjái ja oamasteaddjái, Elon Musk.

Tesla vástida dán:

– Mis ii leat makkárge kommentára áššái, čállá Tesla Norgga ja Islándda Senior gulahallanhoavda Even Sandvold Roland šleađgapoasttas NRK:ii.

Son čujuha Tesla ehtalaš njuolggadusaide. Dain deattuhuvvo ahte fitnodat oppa buvttadanráiddus galgá váldit birasovddasvástádusa, ja láhttet ehtalaččat.

– Suvdilis boahtteáigi eaktuda industriija ja fitnodagaid mat váldet ovddasvástádusa. Nu gohčoduvvon suvdilis čovdosat eai sáhte dáhpáhuvvat jus dat čuhcet eamiálbmogiidda ja birrasii. Dalle dat ii šat leat suvdilis čoavddus, cealká Sámiráđi presideanta Christina Henriksen.

Kampánja #AnswerUsElonMusk lea álggahuvvon Davve-Ruoššas danne go oaivvildit NorNickel ii čuovvol birasgeatnegasvuođaidis Taimirnjárggas dahje Guoládagas.

– Nornickel fitnodagas leat bilideaddji industriijadoaimmat. Eaige sii leat sámi álbmogis jearran lobi čađahit doaimmaideaset, deattuha Danilov.

– Gávttiin čalmmustahttit kultuvramet

Andrei Danilov lohká iežas čiŋadit gávttiin nu dávjá go sáhttá. Dan son dahká maiddái gáktebeaivve.

Danilov lohká Guoládaga sámekultuvrra garrasit áiton. Danne lea gáktebeaivi mávssolaš doaibma čalmmustahttit sámekultuvrra.

– Go cokkan gávtti de lean mielde ovddideamen duddjoma, árbevieruid ja iežan identifiserema, čilge Danilov.

Lujávrelaš lohká iežas juohke beaivve geavahit gávtti elemeanttaid. Maiddái dalle go sus leat badjelis oarjemáilmmi biktasat. Erenoamážit boahkána.

– Ollugat jerret mus manne nu? Mun vástidan sidjiide, ahte dáinna čájehan iežan sámevuođa. Ná muitalan gii mun lean. Jus geavahan sámi gárvvuid de mu siellu rievdá, čilge son.

Čihččet gáktebeaivi

Noereh nuoraidorganisašuvdna dat ásahii sámi gáktebeaivvi.

Cuoŋománu 10. beaivve jagis 2014 lágiduvvui vuosttaš gáktebeaivi miehtá Sámi. Das rájes lea jahkásaččat lágiduvvon dán beaivve.

Dán jagi maŋiduvvui gáktebeaivi čakčamánu 10. beaivái koronavirusa geažil.

– Stuorra áigumuš gáktebeivviin lea dahkat gávtti fas árgabeaibivttasin. Mis ii leat miige váttisvuohta dainna, ahte oappámet ja vielljamet Guoládagas geavahit dán gižžobeaivin, lohká Noereh jođiheaddji Elen Ravna.