Dáhttu diehtit ođđa várrepresideanta nama

Sámediggeáirras, Geir Tommy Pedersen, gáibida ahte Sámedikki dievasčoahkkin beassá diehtit gii šaddá ođđa várrepresideantan.

Geir Tommy Pedersen
Foto: Dan Robert Larsen / NRK

Dálá várrepresideanta, Laila Susanne Vars, lea ožžon direktevrra virggi Gáldus, mii lea álgoálbmot gelbbolašvuođaguovddáš Guovdageainnus. Vars bellodat, Árja, válljii duvle ođđa várrepresideanta Sámediggái, muhto eai álmmut gii son lea ovdalgo leat addán buot dieđuid Sámediggepresidentii, Egil Ollii.

Sámedikki dievasčoahkkin ii leat ožžon čálalaš dieđu ahte Vars luohpá ráđis, iige dieđe gii su ovddas joatka ámmáhis.

– Lea riekti diehtit

Laila Susanne Vars

Laila Susanne Vars lonuha ámmáha

Foto: Dan Robert Larsen / NRK

– Oaivvildan ahte sámi álbmogis lea riekti diehtit gii galgá stivret Sámedikki, ja go leat addán dieđu ahte ráđđelahttu ii šat joatke, de berre álmmuhuvvot gii su sadjai boahtá, lohka Norgga Sámiid Riikasearvvi Geir Tommy Pedersen.

– Manne dárbbahehpet diehtit go Vars ii luoba ovdal miessemánus?

– Sámediggi orgánan ferte dan meare árvvus adnojuvvot ahte muitalit gii šaddá ođđa njunušolmmoš Sámedikkis, ja lea ártet go eai álmmut nama, lohka son.

Ii leat ohcan virgelohpi

Sámediggepresideanta, Egil Olli (Bb) logai dievasčoahkkimis ikte, gaskavahku, ahte sus ii leat intenšuvdna rievdadit ráđi.

– Laila Susanne Vars lea njálmmálaččát addán dieđu ahte lea ožžon direktevra virggi Gáldus, ja ahte hálida álgit dán ođđa virgái. Muhto son ii leat ohcan virgelobi, dajai Olli gaskavahku.

Várrepresideanta Vars (Árja) dieđiha ahte áigu ohcat virgelobi.

– Ovdal boahtte dievasčoahkkima lea presideanta ožžon ohcámuša, lohka son.

Lea dieđihan

Vars ii loga dábálažžan ohcan virgelobi jagi ovdal go áiggušii luohpat, ja lohka iežas muitalan presidentii dán birra. Maiddái ovttasbargoguoimmit, iežas joavku ja bellodatjođiheapmi lea ožžon dieđu ahte lea ožžon Gáldus virggi ja áigu álgit dohko ovdal miessemánu vuostaš beaivvi.

– Sámediggepresideanta sáhttá okto válljet iežas ráđđelahttuid, nu leat njuolggádusat. Gažáldat sáhttá go rievdadit ovttasbargošiehtadusa, boahtá das mot mii leat šiehttan go vuollaičáliimet šiehtadusa, lohka Laila Susanne Vars.