Eai váldán vuhtii lobálašváidaga
Kárášjoga gielddastivrra eanetlohku mearridii ikte doalahit suoidnemánu mearrádusa guoddalit diggegotti duomu áššis Arnar Vuolab Jørgensen ja gieldda gaskkas. Gielddastivra ii váldde vuhtii opposišuvnna lobálašváidaga. Opposišuvnnas oaivvildit ahte gielddastivrraáirras Berit Astrid Utsi (Bb) soaitá leat bealálaš go su ovttasássis lei guovddáš rolla dán áššis. Ášši sáddejuvvo stáhtahálddašeaddjái loahpalaš mearrádussii.
Gielda dubmejuvvui Jørgensenii máksit 1.013.510 ruvnnu go eai doarvái bures veahkehan su go mánnán givssiduvvui Kárášjoga skuvllas.