NRK Meny
Normal

Ballá neaskinmašiinna ráigat gápmasiid

Duojár eahpida ahte mašiinna neskon gápmasat šaddet lihká buorit, go gápmasat mat leat neskon árbevirolaččat.

Duodji utøver har store forventninger til den nye skankemaskinen som Sametinget har ordet til Duodjeinstituhtta.

Duodjeinstituhta Inga Hermansen oaččui sihke njuoska ja goike gápmása duojáris Karen Márehis(ruoná jáhkka mašiinna duohken). Duojár áiggui iskkat ráigá go mašiidna goike gápmasa.

Karen Máret lea neaskán bohccogápmasiid olles eallinagi.

Dál son árvvoštallá áibbas ođđa neaskinmašiinna ávkkástallat, muhto ballá ahte dainna eai šatta lihká buorit gápmagat go jiehkkuin.

– Mun háliidan oaidnit lea go dat dakkár mii gaikkoda gápmasiid. Jus šaddet olu ráiggit maid šaddá duokŋat, de gal eai biste gápmagat nu guhka, lohká duojár Karen Máret Sara.

Sámediggepresideantta almmuhii mašiinna

mánnodaga bođii Sámediggepresideantta almmolaččat čájehit ja bidjat atnui neaskinmašiinna Guovdageainno duodjeinstituhtas.

– Neaskit lea losses bargu. Mun sávan dát mašiidna sáhttá maid addit eanet dietnasa duojáriidda, lohká Sámediggepresideantta Aili Keskitalo.

Sámediggi skeŋke mašiinna sihke Guovdageidnui ja Kárášjohkii, mat mákset oktiibuot 28 000 euro.

Hástalii Duodjeinstituhta jođiheaddji

Duojár Karen Máret hástalii Inga Hermansena geahččalit neaskit sihke njuoska- ja goikegápmasa.

Olbmot geat ledje boahtán mašiinna almmuheapmái šuohkihedje go oidne man linis ja dimis mašiinna neskon gámas šattai.

– Dát gal šattai buorre, lohká Duodjeinstituhtta-jođiheaddji Inga Hermansen ja geahčesta Karen Máreha guvlui ja dadjala vel.

– Na jus duojár ieš lea duhtavaš gii galgá dáinna gápmagiid goarrut.

– Jua, mun gal lean duhtavaš, vástida Karen Máret, seammás go studere dan easka neskon goikegápmasa, mii šattai nu fiinnis.

Njealje minuhtta ádjána neaskit gápmasa

Duodjeinstituhta Hermansen muitala ahte dábálaččat ádjána jiehkkuin neaskit sullii 20 minuhtta ovttain gápmasiin. Mašiinnain ii ádján go njealje minuhtta.

Muđui muitala ahte duojáriidda šaddá hálbi boahtit mašiinnain neaskit.

Mii eat boađe váldit eará sullii 20 ruvnno gotturis(njealji gápmasis), lohká son.

Jáhka buoret dietnasa mašiinnain

Karen Máret áigo ávkkástallagoahtit mašiinna ja jáhka buoret dietnasa šaddat mašiinnain.

– De sáhttá, manne ges ii. De don it dárbbaš oainnat neaskit. Beasat baicca dikšut ja álgit goarrut dan sadjái go neaskit, lohká son.