Mátta-Trøndelaga diggegoddi mieđihii guovllu sávzabondii eanet boraspirebuhtadusa, go dan maid eisseválddit ledje mearridan.
Vaikko sávzadoalu ja boazodoalu ii sáhte buohtastahttit, de sáhttá dát duopmu leat ávkin maid boazodollui, dadjá Norgga Boazosápmelaččaid riikasearvvi jođiheaddji, Nils Henrik Sara.
- Go dákkár doabmu celkojuvvo luonddus guohttu elliin, ahte dain lea boastut máksojuvvon buhtadusat, de berrehan dat čuovvut maid dan nuppi seammasullasaš ealáhussii. Boazodoallit maid galget oaččut stuorát buhtadusaid go dál, dadjá Sara.
Váiddii buhtadusaid
Mátta-Trøndelaga fylkamanni ii dohkkehan boraspirebuhtadusa sávzabondii, Ola Krokann massii 55 sávzza boraspiriide 2008s. Čilgehus lei, ahte eai gávdno duođaštusat, ahte lea boraspire goddán sávzzaid. Krokann váiddii dán direktoráhtii, gos mieđihedje buhtadusa 16 sávzii.
Ovddit beaivvi celkkii Mátta-Trøndelaga diggegoddi ahte Krokann galgá oažžut eanet buhtadusa, go eisseválddit eai sáhte duođaštit ahte eai leat boraspiret mat leat vaháguhttán, ja ii galgga vuođđun man olu ráppiid duođašta, go lea maid váttis gávdnat buot maid massá, čállá Nationen áviisa.
Boazodoalus vel váddásut gávdnat
NBRa jođiheaddji Nils Henrik Sara sávvá ahte eiseválddit dáinna duomuin rievdadit dálá boraspirevahát ortnegiid maid boazodoalu ektui.
- Die lea juoga maid sii fertešedje oažžut eisseválddiid áddet, ahte boazodoalu vahágat leat mealgat váddásut duođaštit, go eará ealáhusain.
GULDAL:
