Davvin unnán čáhci magasiinnain: – Heahtedilli
Davvi-Norgga čáhcemagasiinnaid deavdindássi lea hirbmat vuollin, čájeha Norgga čázádat- ja energiijadirektoráhta (NČE) vahkkosaš magasiidnastatistihkka.
Dat sáhttá mearkkašit ahte Davvi-Norga oažžu «Oslo-hattiid» dán geasi elrávnnjiin. Sivvan dasa lea ahte Davvi-Norga soaitá šaddat Mátta-Norggas ja Davvi-Ruoŧas oažžut elrávnnji, go davvin buvttaduvvo nu unnán.
– Dat attašii veahá alit hattiid go dan masa olbmot davvin leat hárjánan daid maŋimuš 2-3 jagiid, čilge Volt Power Analytics fápmoanalyhtalaš Olav Botnen.
Son einnosta hattiid sullii 35-40 evrre kw/t Davvi-Norgii dán geasi. Botnen ii leat fuolas dilis, ja čilge ahte davvin geavahit unnit elrávnnji kapasiteahtta ektui.
Muhto Bearddu sátnejođiheaddji, Toralf Heimdal, dadjá ahte Álddesjávrris, mii golgá Romssa stuorámus fápmogáldui, Bearddujohkii, lea unnán čáhci.
– Dárbbašat olu njuoskkadaga ovdalgo deavdindássi lea dábálaš dásis fas čakčat. Dat lea áibbas veadjemeahttun, dá lea heahtedilli, cealká Heimdal.