Bissehan bávkalemiid Riehpovuonas: – Eai leatge rivttes lobit

Les på norsk.

– Mii gáibidat ahte olles prošeakta loahpahuvvo.

Nu dadjá Nils Mathis Mikkelsen Sara, gii lea Fiettar-orohaga nubbejođiheaddji.

Sin boazodoalloguovlu lea seamma báikkis gos Blue Moon Metals dál čađahii bávkaleami. Dása dat galggašii Finnmárkkus šaddat ruvkedoaibma.

Vuosttaš bávkaleapmi dáhpáhuvai mannan vahkus guottetáiggi.

Dál leat gaskaboddosaččat mearridan bissehit bargguid.

Boazosámiide lea olles ruvkedoaibma leamaš hástalussan. Dát váikkuha eanemusat misiide, go dat sáhttet šaddat eatne haga. Dat sáhttet de jápmit.

– Eallu dárbbaša dan ráfi maid dárbbaša nanusmahttit iežaset boahtte dálvái. Sii muosehuhttojit hirbmadit dákkár daguid geažil, dadjá son.

– Mii leat juo heivehan iežamet, iige leat šat eanet maid addit ođđa sisabahkkemiidda, dadjá son.

Doallan čoahkkima

Fiettar-orohat ja Luonddu Nuorat (NU) leat otne čoahkkimastán Blue Moon fitnodagain, muitala boazosámiid advokáhta Jon-Andreas Lange.

– Dát lea danin go fitnodat nugo, mii diehtit, lea álggahan geahččalandoaimmaid vaikko sidjiide eai leat addon lobit. Fitnodat dáhtui čoahkkima iskan dihtii dan.

Sii gáibidedje ahte bargu bissehuvvo dassážii go dát iskojuvvo ja dohkkehuvvo.

– Lea álgovuorus fitnodat mii dasa vástida, dadjá Lange.

Nu ahte orohat ii leat doalvumin diggái maidege vel, nu go álggos lei dieđihuvvon.

Fiettar-orohat ja Luonddu Nuorat, geat maid ledje čoahkkimis, vurdet dál vástádusaid Blue Moonas.

Ođđa mihtu olahan

Kanadalaš Blue Moon čállá preassadieđáhusas ahte bargu mii álggahuvvui duorastaga geassemánu 12. beaivve, lea ođđa mihttu, maid leat olahan.

«Dát lea álgun ođđa kapihttalii gelddolaš Nussir-historjjás, ja dat dahká ahte leat lávken dan guvlui ahte leat mielde gokčamin Eurohpa veaike-dárbbuid.»

Entreprenevrras Leonhard Nilsen og Sønner AS (LNS) dat lea šiehtadus čađahit geahččalanbohkamiid.

Blue Moon vuordá ahte LNS geargá boahtte jagi dáinna ovdabargguin maid leat álggahan. Dát lea fitnodahkii vuođđun investerenmearrádusaid dahkat jagi 2026:s.

Øystein Rushfeldt Blue Moon Metals fitnodagas lea ožžon moaitámuša orohagas, muhto ii atte jearahallama NRK:i ovdal maŋŋebárgga.

Sii eai vuollán

Luonddu Nuorat (NU) leat fas vuostálastimin ruvkedoaimma Fálesnuoris. Sotnabeaivve ceggejedje lávuid Fálesnuorrái Márgohpnjárgii.

Jagi 2021:s lei miellačájeheapmi birrasii 100 beaivve. Dalle bissehuvvui ruvkeprošeakta gitta dássážii.

– Mun jáhkán ahte mii nagodat bissehit dán prošeavtta, dadjá Kornelia Lise Kristensen. Son jođiha Tromssa Luonddu Nuoraid.

Akšunisttat leat veahá fuolas dán akšuvnna oktavuođas. Eaiggádat lea maid lonuhuvvon duiskalaččain kanadalaččaide.

– Dan maid sii dahket dál lea iskat áigot go bargagoahtit prošeavttain. Vaikko vel dat leage jáhkehahtti, de ii leat sihkkar sii dahket dan. Mun jáhkán mis lea buorre vejolašvuohta, čilge Kristensen.

Akšunisttat vurdet miellačájehemiin dassážii go ruvkedoaimmat fas leat jođus.

Dan botta go vurdet, de ráhkkanit akšuvdnii. Sii fáktejit ahte fitnodagas eai álgge fas bargat dáid beivviid.

– Mun lean váivvis go mii fertet vuolgit deikke miellačájehemiide. Mii leat dás dassážii go dát ruvkedoaimmat bissehuvvojit, dadjá Kristensen.