Borch áigu gáibidit mávssu badjeolbmuin
Stáhta áigu gáibidit Lágesduottar badjeolbmuid máksit eanemusat 14,1 miljovnna kruvnna. Diibmá dálvve čađahii stáhta álggos dábálaš lohkama mii loahpas gárttai bággolohkan. Bággolohkan mávssii 14,1 miljovnna, dábálaš lohkan mávssii fas 4,1 miljovnna.
– Stáhta lea geatnegahtton gáibidit mávssu goluide čatnon baggolohkamii, oaivvilda eanadoalloministtar Sandra Borch (Gb).
E-boasttas NRK:i čállá Borch ahte nu guhká go regreassaášši lea gieđahallomin de ii leat heivvolaš Eanadoallo- ja biebmodepartemeanttas čilget lagabui mo sii árvvoštallet.
NRK almmustahtii mannan vahkkus ahte stáhta rihkui bargobiraslága 312 geardde go bággolohkama oktavuođas.
Sihke eanadoalloministtar Borch ja Romssa ja Finnmárkku stáhtahálddašeaddji oaivvildeaba ahte lágarihkkumat eai hehttet mávssuid gáibideami badjeolbmuin.
Máŋga siidaoasi vuosttaldedje lohkama, ja danne mearridedje bággolohkama čađahit, čállá Borch e-poasttas NRK:i.
– Golut livčče leat mealgat unnit jus livčče leamaš dábálaš lohkan. Iige livčče šaddat sáhka regreassagáibádusas. Muhto go jo šattai bággolohkan, de lea stáhta geatnegahttojuvvon gáibidit mávssu goluide, čállá Borch.
John Idar Anti lei okta dain guđa badjeolbmos geat oaivvildedje lohkan lei galgat bissehuvvot.
– In vuosttildan lohkama. Lea boastut bidjat ovdan ahte mii vuosttildeimmet. Guohtunroasu dihte min mielas ii lean heivvolaš vuojehit ealu miilaviissaid gárdái.
Sutnje bággolohkan lei roassu bohccuid buresveadjima dáfus.
– Bohccot jámadedje go vuojehedje ealu helikopteriiguin ja skohteriiguin. Maŋit čavčča mus váilo birrasiid 75 rávis njiŋŋelasa. Dát čuohcá garrasit ekonomalaččat unnimusat 5-6 jagi ovddos guvlui.
Anti mielas dássážii leamaš beare sáhka stáhta ruhtageavaheamis. Su mielaš galggašii digaštallot eanet das makkár váikkuhusat bohccuide ledje stáhta daguid geažil.
Stáhtahálddašeaddji Elisabeth Aspaker ii dieđe vel man stuoris regreassagáibádus šaddá.
