60 jagi lea Sportsrevyen oidnon NRK TV:s, muhto dál heaittihuvvo dat prográmma. Valáštallanredaktevra Espen Olsen muitala ahte go NRK:s lea dál čavgeš ekonomiija, de leat sii ferten geahpedit buot divišuvnnain ja sisdoalus. Valáštallanprográmma lea čájehuvvon TV:s juohke vahkku jagi 1960 rájes, ja prográmmas čoahkkáigesset das mii lea dáhpáhuvvan valáštallamis, eanaš Norgga valáštallamis.
SAS girdifitnodagas lea 8 miljárdda ruoŧa ruvnno vuolláibáza jagi 2022, nu boahtá ovdan jahkerehketdoalus. Maŋemus kvartálas lei vuolláibáza 1,7 miljárdda ruoŧa ruvnno. Sivvan go lea vuolláibáza lea earret eará alla dollárkursa. Ikte eahkes šiehtai fitnodat norgga kabinbargiiguin ođđa bargošiehtadusa, ja nu ii šatta bargoheaitta juovllaid.
Sámedikkis lei áigumuš hukset ásodagaid Kárášjohkii ollesáigge politihkkariidda ja ráđđeaddiide.
Dál loahpahuvvo dát proseassa danne go dállohuksen lea divron.
Sámediggi čállá neahttasiiddus ahte Statsbygg oaččui barggu 2020:s guorahallat huksenvejolašvuođaid.
Dát proseassa dagaha vuollebáhcaga sámediggeráđđái, daningo Statsbygga rehket lea 3,17miljovnna ruvnna.
Sámediggeráđi rehketdoallu čájeha 2,29 miljovnna ruvnnu vuolláibáhcaga.
— Dállohuksen šaddá min mielas beare divrras dan ektui maid mii dál máksit sullasaš láigodáluin Kárášjogas, lohká sámediggeráđđi Runar Myrnes Balto (NSR).
