Álgoálbmotáššiid foruma New Yorkas: – Inuihtalaš nuorat ledje dehálačča Nunavuta iešstivremii
– Jáhkán ahte lea dehálaš fuomášuhttit inuihtalaš eamiálbmotnuoraid Nunavutas Kanádas. Sii ledje dehálačča go barge iešstivrema ovdii Kanáda eiseválddiin.
Dan dadjá kanádalaš Ms. Aluki Kotierk NRK:i.
Son lea ONa álgoálbmotáššiid bistevaš foruma miellahttu jagiid 2023-2025. Son bargá eamiálbmotrivttiid olis, ja lea dál New Yorkas ONa álgoálbmotáššiid bistevaš foruma oktavuođas.
Oassin njulgenbarggus vearrivuođa geažil álgoálbmogiid vuostá, lea Kanada ásahan Nunavuta sierra álgoálbmotguovlun. Dán jagi vuolláičállojuvvui loahpalaš šiehtadus Kanáda ráđđehusain.
– Sii geat vuolggahedje digaštallamiid ja inuihtaid lihkadusa ledje 19-jahkásaččat, dadjá Kotierk.
– Lea dehálaš, ahte nuorat muitet, man ollu sii sáhttet leat mielde, ja ahte sii buoridit álgoálbmogiid eallimiid, ja nannejit min rivttiid.