Musihkalaččat lea Aili Kathrine Wergeland Teigmoas (18) leamaš hui gelddolaš jahki. Son lea álmmuhan Youtube videojuogadan neahttabáikái musihkkavideo mainna šattai oalle beakkán go badjel 3,6 millijovnna geardde leat olbmot dan geahččan, ja lea maid ovttasbargan nuortariika DJ:aiguin. Dál lea son mielde ođđa musihkkavideos maid lea Espánnja musihkkariin, Marsal Venturain ráhkadan.
Aili Teigmo lávddis Barcelonas
Foto: Aili Teigmo– Mun lean leamaš Barcelonas báddemin musihkkavideo. Šaddá oba gelddolaš oaidnit bohtosa, in leat vel iešge beassan dan oaidnit, muitala Aili Kathrine.
Aili Kathrine lea ráhkadan máŋga musihkkavideo maid almmuha iežas youtube Kanalai. Doppe son lávlu dovddus lávlagiid maid eará beakkán musihkkarat leat ráhkadan.
Aili Teigmo musihkkastudios Barcelonas
Foto: Aili TeigmoÁlohii háliidan iežas musihkka buvttadit
– Mus lea álohii leamaš miella ráhkadit iežan musihkka, iežan teavsttaid čállit ja lávlut, muhtto ii mus leat leamaš dat vejolašvuohta. Dál viimmát lea dat vejolašvuohta rahppasan.
Aili Kathrinii lea leamaš olu ávki ráhkadit coverlávlagiid, ja lea seammás oddjon olu fuomášumi. Dal jerret musihkkarat sus sáhtášii go lávlut sin šuoŋain.
– Mun jahkán mun njulgestaga lean dárbbašan dan áiggi láddat. Dal dovddan ahte lean áibbas gearggus ja lean bidjan olu návccaid ja áiggi čállit teavsttaid maŋemus áiggi.
– Nu ahte 2017 fertet čuovvut mielde, dalle boađan almmuhit ollu ođđa musihka, loahpaha vel Aili Kathrine Wergeland Teigmo
