Meteorologat dieđihedje muohttit olu davvin, ja nu duođas dagaige. Maŋimuš jándoris lea muohttán 60 cm, ja máŋga geainnu leat gitta muohtauđđasiid ja muohtauđasvára geažil.
Máŋga gilis Romssas leat olbmot ferten guođđit ruovttuideaset stuorra muohtauđasvára geažil. NVE:s lohket ahte soitet eará báikkiin maid olbmot gártat guođđit ruovttuideaset.
Suoma lahttuvuohta bealuštanlihttu Natos lea dál sihkkaraston, go Durkka parlameanta dohkkehii Suoma Nato-lahttuvuođa maŋŋit duorastateahket, čállá Yle Sápmi.
Dál buot 30 Nato-riikka parlameanttat leat ratifieren Suoma lahttuvuođa.
Durkka presideanta galgá vel nannet iežas oasil lahttuvuođa ratifierema.
Dan maŋŋá Nato váldočálli Jens Stoltenberg bovde Suoma dievaslaš lahttun bealuštanlihttui.
Stoltenberg čállá Twitteris, ahte Suoma lahttuvuođa ratifieren dahká Nato gievrrabun.
Guovdageainnu buollinčáskadeaddjit leat odne iđđes ferten dollet Láhpoluobbalii go doppe lei barta buollimin. Finnmárkku 110-guovddážis muitalit ahte lei dat lei buollimin njuovččadollan ja diktet de bartta buollit geahču vuolde. Barttas eai lean olbmot, dieđihit politiijat Twitteris.
