Baikkalas olbmot ja birasgahtenlihttu čájehedje garra vuostehagu plakáhtaiiguin.
Troms Kraft ovdanbuvttii iežaset bieggamilloparkka ceggenplánaid Riehppi várregilgii, muhto Omasvuona suohkan lea botken ráđđádallamiid Troms Kraft:ain.
Sivvan dasa lea go Troms Kraft fállá beare unnán tietnasa suohkanii, ja nu eai dáhto joakkit ráđđádallamiid ovdal dát čielga, dadjá sátnejođiheaddji Sigmund Steinnes.
Eanaš olbmot ledje sáhkkit gullát makkár váikkuhusat 26 stuora bieggamillut dagahit Riehppi guovllus Ivgobađas. Gažaldagat ledje olu. Troms Kraft čilgii iežaset áigumušaid, ja Norgga čázádat- ja energiijadirektoráhta ges čilgii makkár gáibádusaid sii bidjet dákkár stuora bieggamillopárkii.
Gávdnui soames guldaleaddji gii lei mielas bieggamilluide Riehppái. Bassevuovddi boazodoalloorohagas geavahit guovllu birra jagi, sii diehttalas eai juollut eanet guohtoneatnamiid massit, dadjá jođiheaddji Karen Inger Marit Baal.
Omasvuona sátnejođiheaddji Sigmund Steinnes čilge ahte sii leat botken šiehtadallamiid Troms Kraft:ain, muhto sii leat gergosat joatkkit jus boahtá buoret dienas suohkanii.
- Guldal ášši: